Patioa hezkuntza bihurtzen denean

Jolas-orduak ere hezi egiten du: jolasa, harremanak eta ongizatea patioan

Ikastetxe batean, hezkuntza informalak garrantzi handia du, ikasgelan ematen den ikaskuntza osatzen eta indartzen baitu. Zentzu horretan, jolasgaraiak bereziki une delikatuak eta esanguratsuak dira, horietan ikasleen gizarte-harremanak, bizikidetza eta ongizate emozionala jokoan jartzen baitira.

Urnietako Salestarrak  Magale ikastetxean arreta bereziz zaintzen ditugu gune hauek. Irakasleen presentzia aktiboak, jolasgaraietan, gatazkak prebenitzeaz gain, irakasleen eta ikasleen arteko harremana hobetzen du, ikasle bakoitza ingurune lasaiago batean hobeto hurbildu, behatu eta ulertzeko aukera eskainiz.

Gainera, aisialdia funtsezkoa da talde batean integratzea kostatzen zaien ikasleei laguntzeko. Horregatik, astean bi egunetan, talde bakoitzak bere tutorearekin batera joko gidatuetan parte hartzen du, ikasle guztien inklusioa eta parte-hartzea bermatzeko.

Halaber, astean behin, talde bakoitzak barne patioaz goza dezake bere tutorearekin batera. Espazio honek ping-pong mahaiak eta rokodromoa ditu, baita koltxonetak ere, ikasleen jolas partekatua, bizikidetza eta garapen pertsonala errazten dituen ingurune atsegin, seguru eta motibatzailea sortuz.